منه لای لای چالانا
من کی جاوان اؤلوٍرم
گئدین دئـیین آناما
گل منی بنده آتما
خویدان مرنده آتما
هامی اوٍز دؤندریبدیر
گل منی سن ده آتما
آغ شالـین بورما - بورما
اوْوجوندا قارا خورما
منی سنه وئرمزلر
آتـین چک بوردا دورما
بولاغی بولاندیرما
ال سالـیب دوْلاندیرما
گئدیرسن تئز قایـیت گل
گؤزوٍموٍ سولاندیرما
عزیزیم قـیزیل آلما
بوْشقابا دوٍزوٍل آلما
چیرکین آل اصیل اوْلسون
بد اصیل گؤزل آلما
اندیم بولاق باشینا
یازقی یازدیم باشینا
گلن گئدن اوْخوسون
نهلر گلیب باشیما
خوْش گلیبسن اوْتاغیما
ایشیق تؤکدوٍن اوْجاغیما
یوْرغون جانـیم قوربان اوْلسون
سنین کیمی قوْناغیما
آی قـیز دور گل یانـیما
قادان آللام جانـیما
من سندن ال چکمهرم
آند اوْلا ایمانـیما
بوردان اوزاق مییانا
سنی یانایدین آنا
سن قوْیمادین من گئدهم
اوْ سئودیییم اوْغلانا
گل گئدهک دار دالانا
دیبی یوْخ دار دالانا
حکیم ، طبیب نئـیلهسین ؟
اوٍرکده درد اوْلانا
زامانا آی زامانا
اوْخو قوْیدوم کامانا
ائششکلر آرپا یـئـییر
آت حسرتدی سامانا
دامدا دیرک قاینانا
ائـیلهر بزک قاینانا
اوْغلو ائوه گلنده
اوْلار زیرک قاینانا
آی دوْلانا - دوْلانا
دوٍشدوٍ بیزیم ائـیوانا
قـیز, سنی دوْغان ننه
اوْلسون منه قاینانا
عزیزیم سن دیوارا
قدم قوْی نردیوانا
زر قدرین زرگر بیلر
نه بیلیر هر دیوانا؟!
عزیزیم کاسا دوْلماز
مرد الی کاساد اوْلماز
یوز نامردین چؤرهیین
دوْغراسان کاسا دوْلماز
***
اینگیلیس ایمانسیز
ایتالیا قورانسیز
بیزه اینه وئرمهسه
بیز قالاریق تومانسیز
***
قیزیل اینه ساپلانماز
آتارام اوْدا یانماز
دئسم باشیم آغرییـیر
یاد اوغلودور اینانماز
***
دامدان داما دامیمیز
قوْشادیر ائیوانـیمیز
سن اوْردان گل، من بوردان
کؤر اوْلسون دوشمانـیمیز
***
چای قیراغی بیچیلمز
سویو درین گئچیلمز
بیر جاندان ، بیرده یاردان
شیرینلیکدن گئچیلمز
***
گلیردیم یاواش یاواش
آیاغیما گلدی داش
سندن منه یار اوْلماز
گل اوْلاق باجی قارداش
***
سو دریندی گئچیلمز
بولانلیقدی ایچیلمز
دئـییرله یاریندان گئچ
یار شیریندی گئچیلمز
***
عزیزیم بولاریمیش
ایچمهلی سولاریمیش
عئزراییلین آدی پیس
جان آلان یوْللاریمیش
***
باشیندا گؤموش سانجاق
گئدیردی بیر یار آنجاق
دئدیم بو اوجا بوْی یار
گؤرهن منیم اوْلاجاق
***
قیزیل اوزوک دار بارماق
سؤزلرین بال، دیل قایماق
سئوگیلرین حاققیدیر
کؤنول تاپشیریب آلماق
***
قالادان اندیم آنجاق
باشیمدان ساری سانجاق
نه قیز اوْلدوم، نه گلین!
اوْدلارا یاندیم آنجاق
***
قیزیل اوزوک دار بارماق
اؤیرهنیرم تار چالماق
منیم نه واختیم ایدی
بوْشانـیب ائوده قالماق
***
آلمالار بوداق بوداق
یاراندیق بیز، قم اوتاق
نئیلهمیشدیم، کؤسموسن؟
نه ائیلهییم باریشاق
***
توت آغاجیندا یارپاق
توتو وار بارماق، بارماق
یالاندی یاردان دوْیماق
آغیز سوت، دوْداق قایماق
***
دووار اوستو پیتـیراق
قیزلار گلین اوْتوراق
اوْتورماقدان نه چیخار؟
گلین اوْلاق قورتولاق
***
من یاری گؤردوم بایاق
الینده ساری داراق
قاچدیم توتا بیلمهدیم
سیناسان بئله آیاق
***
توت آغاجی پیتـیراق
چادیر چالاق اوْتوراق
بیرین سن دئه، بیرین من
قوْی بو قمدن قورتولاق
***
آبی پاچین، گوی داراق
یاریمی گوردوم بایاق
قاچدیم چاتا بیلمهدیم
سینایدی بئله آیاق
آغ آت گلیر بوزا – بوزاچییـنینده وار قـیزیل قوْزا
آغ آت بوْینون سینایدی
قارداشیم باتـیب توْزا
اندیم باغا، گیلاسا
تؤکولدو کاسا- کاسا
آللاه قـیزی یارادیب
اوْغلان باغرینا باسا
گئدیرم گئدن اوْلسا
یوْلو گؤرسهدن اوْلسا
یارا نامه یازمیشام
یانـینا گئدن اوْلسا
نارینجین تؤکدوم آشا
قاینادی گلدی جوْشا
سندن منه یار اوْلماز
قاخینجین گلدی باشا
نارینجی تؤکدوم آشا
قاینادی گلدی جوْشا
بو یار منیم دئـییلدی
قاخینجی گلدی باشا
زنگان اوستو مراغا
تئلیم گلمز داراغا
هر کسین یاری گئدیب
گلسین گئدهک سوْراغا
بوردان اوزاق مراغا
تئلین گلمز داراغا
منیم یارام بالادی
اؤیرهتمهیین ایراغا
باخچامیزدا نارلـیغا
گووهنمه بو وارلـیغا
گؤزللیک, وارلـیق گئدر
الین دوشر دارلـیغا
تکهم گئدیب خانلـیغا
باش قوْیوب سولطانلـیغا
تکهمی اؤلدوردولر
آتدیلار سامانلـیغا
داغلاردا گؤردوم لالا
الده دوتوب پییالا
کیم گؤروبدور دونـیادا
ظولم ائوی آباد قالا
بو قالا بیزیم قالا
همیشه بیزیم قالا
قورمادیم اؤزوم قالام
قورموشام ایزیم قالا
بو قالا داشلی قالا
چیـنقـیللی داشلی قالا
قؤرخورام یار گلمهیه
گؤزلریم یاشلی قالا
آل کمری بئل باغلا
ساچلارین آچ تئل باغلا
نه یادا سیررین دانـیش
نه نامرده بئل باغلا
قاپی دؤین کیم اوْلا
آچ گله حکیم اوْلا
یارالاریم سیزیلدیر
بلکه ده یاریم اوْلا
سو اوزونده قابلاما
گؤزون قوربان آغلاما
گئدیرسن تئز قایـیت گل
یادلارا بئل باغلاما
آغ چارقادین باغلاما
گؤزون قوربان آغلاما
گئدهرم تئز گلهرم
یادلارا بئل باغلاما
توپلویان (آیلار خانیم)
چای منیم چشمه منیم
چاییمدان گئتشمه منیم
من سنه هاچان دیدیم
«سویو»مدان ایشمه منیم
گولو بیچهنه قوربان
«سو»یو ایچنه قوربان
ایپک اؤرتوک بورویوب
بوردان گئچهنه قوربان
من عاشیق نئجه گئچیم
بو«سو»دان نئجه گئچیم
دونیانی نامرد آلیب
مردلری نئجه سئچیم
داغ لاری آشدیم گلدیم
«سو»کیمی داشدیم گلدیم
یاری بی وفا گؤردوم
الیندن قاشدیم گلدیم
.
«سو»گلیر آرخا- آرخا
تؤکولور بیزیم آرخا
قونشودا بیر قیز سئودیم
آنامدان قورخا- قورخا
«سو»گلیر قالخا- قالخا
تؤکولور بیزیم آرخا
گیزلینده یار سئومیشم
آنامدان قورخا- قورخا
عزیزیم دئیدی یارا
«سو»گلدی دئیدی یارا
لال اولسون منیم دیلیم
نه دئدیم دئیدی یارا
«سو»گلر لوله- لوله
تؤکولور قیزیل گوله
دوشمان لار ائویمی ییخدی
اوزومه گوله- گوله
سو»گلر آرخا نوار
دولانار چرخه نوار
دوستوم مندن کوسوبدور
بیلمیرم خالخا نه وار
«سو»گلر میللندیرر
باغچانی گوللندیرر
من دوستومدان کوسموشم
دوست منی دیللندیرر
داغ لاری گزدیم گلدیم
«سو»لاری دوزدوم گلدیم
دوستومو بی وفا گؤردوم
الیمی اوزدوم گلدیم
داغ لاری گزن منم
«سو»لاری دوزن منم
آیاق یالین، باش آچیق
سرگردان گزن منم
دالان آلتی دریندی
«سو»سپیرم سریندی
قارداش آداخلین گؤردوم
نه آلا گؤز گلیندی!
«سو»گلر آخار گئدر
یار گلر باخار گئدر
یارین ائله باخماسی
ائویمی ییخار گئدر
دالان آلتی زیلزیله
«سو»سپدیم قیزیل گوله
یئددی دسمال چوروتدوم
گؤزومو سیله- سیله
«سو» گلر لوله- لوله
یار گلر گوله- گوله
جیبینده گول دسمالی
قان ترین سیله- سیله
«سو» گلر آخار گئدر
یاندیرار یاخار گئدر
بو دونیا بیر گوزگودو
هر گلن باخار گئدر
قاپی قاپی یا باخار
قنوولاردان «سو» آخار
او قاش گؤز کی سنده وار
هامی دالینجا باخار
«سو»گلر آخماغینان
یاندیریب یاخماغینان
یار یاردان نئجه دویسون
دالدادان باخماغینان
میانادا قویو واردی
آبی کوزه «سو»یو واردی
درد الیندن اؤلدوم
دیلی یئتن دئییر قویو واردی
«سو» گلر آخار گئدر
دربندی ییخار گئدر
دونیا بیر پنجره دیر
هر گلن باخار گئدر
دریادا دیر بالیق لار
«سو»دا اوینار بالیق لار
قول لارین سال بوینوما
دئییرلر آیریلیق وار
گلین گئدک بولاغا
«سو»یو سرخوش بولاغا
بیرین سن دی، بیرین من
تؤکک قان یاش بولاغا
من «سو» کیمین آرخا دولاندیم
ساپ کیمین چارخا دولاندیم
فلک سنین الیندن
من قورخا قورخا دولاندیم
«سو» گلر بوروق- بوروق
«سو»وا ووررام یوموروق
دیسه لر یارین گلیر
گردن بندیم موشتولوق