+0 به یه ن
استاد هوشنگ جعفری
آچین آققیشقالاری
آچین آققیشقالاری
هاوالار تک اوره گیم دولقون دور
قورویان داغلارا یاغماق دیله ییر
سئل اولوب ظالیم اویون یخماقا آخماق دیله ییر
ایلدیریم.تک گئجه باغرین یارا شاخماق.دیله ییر
گونه باخماق دیله ییر
آچین آققیشقالاری
..... سید حیدر بایات
چایلارا دا
هئچ فیکیرلشرسنمی سئوگیلیم!؟
آراز
آرپا چایی
و
فرات.
آزادلیغین یوخلوغوندا
چایلار دا
عطش پایلاشیر
و آیریلیق
و اؤلوم
استاد عباس بابایی (سویلر)
سیبریا شاختاسی بوزلادیب قانین
کولک لر،بوران لار کیریدیب جانین
دا چکیب باشینا بوزلار یورغانین
سؤووشوب قرین لر،یاتیب اژدها
یخیلیب چوخداندیر هله اؤلمه ییب
قارالیب داش تکی،داشا دؤنمه ییب
ایچی گیزلین وولکان،هله سؤنمه ییب
یوخو باتلاغیندا یاتیب اژدها
پرویز سودی (دالغا)
ساز اورکلندی،یازیق ماهنی دا دیلدن دوشدو
چیخدی سؤز حوصله دن،آخ!بالابان چیرپیندی
گلدی سس سیز اوتوروب وارلیغیما گؤز تیکدی
گؤزگو دیسکیندی،چیراغ سؤنمه ده،جان چیرپیندی
آرالیق قوشمالاریملا اته گین دولدوردوم
آغ گؤرشمکده غزل چیمدی،گومان چیرپیندی
ائله آللاهی چاغیردیم،او سفر سن گئتدین
یوللار اوستونده گونش سؤندو،توران چیرپیندی
گئدر اولسان دا گیلئی لیک،ائله مم،گئتسن گئت!
دئمه ین،گؤر نئجه باغریندا یاران چیرپیندی!
آی خیالیمدا اوچان سئوگی،یالین ایلهامیم
ساغلیغان باده له شیردیک،کی آذان چیرپیندی
ارسلان زنگانلی
دیندیرین، دیسکیندیرین روحوم کی زینداندان چیخا
قوزانا اؤز حقلیگیندن بلکه اینسانلار ییخا
اول سببدن کی جانیم عشقیله چاتدی حقلیگه
قورخورام نیفرت گله، توپراغدا آللهیم سیخا
گورموسوز، سای سالمیسیز، گوندن ده پارلاق بیر گونش
دور، دی قویما، توپراق ایستیر روحوما پالچیق یاخا
هر نه یی دونیا الینده‌ن محو اولان دیوانه‌یم
حق دییه‌ن جاندان سئور کی بوینونا قاندان تاخا
آندا وئرره‌م من سیزی نور تجللا آللاها
دیندیرین، دیسکیندیرین روحوم کی زینداندان چیخا
رحمت لیک استاد حسین منزوی
آچ گؤزون تا یوخودان گول‌لر اویانسین غزلیم
آچ گؤزون تا باخیشیندان گون اوتانسین غزلیم
گؤره بیلمز گؤزلیم(آی)دا اوزوندن گؤزلین
(آی)ا باخ تا کی حسددن پارالانسین غزلیم
سن اولان یئرده گولوم، گول ندی؟ دور گولشنی گز
قوی سنین باشیوه، پروانه دولانسین غزلیم
چیخ چمن سیرینه، مدهوش ائله سرو، سمنی
قوی آدین عطرکیمین باغدا جالانسین غزلیم
گون ندی؟ آی ندی؟ اولدوز ندی؟ گویچکلر آدی
سن اولان یئرده گرکدیر قارالانسین غزلیم
قالمیشام، قاشینی، کیپریک لرینی، گؤزلرینی
قلمیم هانسینی وصف ایلیه؟ هانسین؟ غزلیم
سنی آغوشه چئکنده، اورگیمدن، دئیه‌رم
اولا کاش دور زامان، بوردا دایانسین غزلیم
یادا یانسین، یا که هر لحظه‌سی، هر ثانیه‌سی
بیرایل اولسون، ایلی بیر عمر اوزانسین غزلیم
سنی هر کیم دیله چالسا، گؤروم آغزی قوروسون
گؤروم آغزیندا عؤمورکن، دیلی یانسین غزلیم
ائلیمین غملری بسدیر منه سن آغلاما چوخ
قویما غملر، غمیمین اوسته قالانسین غزلیم
آغلاما. غم یئمه، گول، گول‌لر آچلسین بالاجان
ائله گول تا کی (آتان) غملری دانسین غزلیم
بیرگون بیر اوشاق
سؤیله‌دی آنا باغیشلا منی
دونن بیر یالان دانیشدیم سنه
سؤیله‌دی آنا دئییبسن یالان
چیخاجاق بوینوز ایندی باشینا
قورخودان اوشاق بؤرک قویدو باشا
عاصم اسدی
اوزاقدا بیر ناری توشلاییب ایکن
یئددینجی داشیدا آتدین، دیمه دی
اینجمیش قول لارین آسلا بوینومندان
اوزاقلار قول لارا بویون ایمه دی
- اوزاقلاری نه دن یارادیب تانری؟!
ال یئتمز ، سس چاتماز،تانری سایی دی
- اوزاقلار باخماقا یارانیب یالنیز
اوزاقلار گوزلرین گوزل پایی دی
اوزاقلار هوشونو آپاریب سنین
آرخنان گلن نارلاری گورمه دین
ساچینی اوزاتدین بئله تک آمما
بیر سئوگی الیله اونو هورمه دین...
احمد صادقی
ظلمو گؤردوم جالاییب،مظلومو قان شکلینده
دولانیر اؤز باشینا،یئرده ایلان شکلینده
منی دیندیرمه آمان دیر،قارا قان دیر اورگیم
درد آلیب سینه می، قات قات یارا،قان شکلینده
باغچامیزدا اکیلن گل لره،مات قالمادالایم
قول آتیب،گل گتیریب،آمما تیکان شکلینده
گون به گون شبهه لی سؤزلردی یقین دن دوغولور
تؤکولور ذهنیمه هر لحظه گمان شکلینده
ساییرام هئی باتان اولدوزلاری ظلمت گئجه ده
ایستیرم صبحو گؤرم اؤلکه ده،دان شکلینده
باخما طوفان دی،کولک دیر،بوغولوب یول لاریمیز
بو یالان دیر چکیلیب،عکسی بوران شکلینده
اسمه رم،لاخلامارام،سینسا دا گر قول-بوداغیم
بیر ییخیلماز دایاغیم وار،ساوالان شکلینده
حکیمه خانیم بلوری
قارتال کیمی اؤلومومو
اول، اؤزوم بیله جه یم
زیروه لره اوچا، اوچا.
گیزلی کؤنول نیسگیلیمی
قایالارلا بؤله جه یم
قایالاردا اؤله جه یم.
بولودلارلا بؤله جه یم
زیروه لرده اؤله جه یم.
علی اوجاقلو (سرین)
آنام باخیر، آتام باخیر، باخیش باخیش نه باهارلار-
اسیم اسیم اسیر، اپریر، خزل‌له‌نیر بو دووارلار
باهار بابام بوغوز اوسته، بولودلانیر یاغا باشدان
آنام اوزون توتور آغلیر، یاغیر باشیمدان هاوارلار
دمیرلرین آراسیندان اؤپوشلرین یاناغیمدان-
آلیر؛ گئدیر آرامیزدان، دالیجا چوخلو سوارلار
دمیر قفس دؤشو اوزره، بابام‌لارین باباسیندان
سطیر سطیر یازیلیبدیر، نسیل نسیل بو شعارلار
دمیر چورور، دووار چؤکور، گئنه گول‌لر گونش گؤرور
نه آداملار، نه حووالار، نه دووارلار، نه سوارلار!!!
علی بیانی
دلی عشقین دلی‌سی، اولمایایدیم ای کاش
بو یولون گولمه‌لی‌سی، اولمایایدیم ای کاش
هر بلا گلدی منه، اؤز بلامین سسی‌دیر
او الستین بلی‌سی، اولمایایدیم ای کاش
گؤزو یاشلی اورگی، منه تاپشیردی ازل
بو یتیمین ولی‌سی، اولمایایدیم ای کاش
او یالان‌لار پری‌سی، اولمایایدیم ای کاش
عؤمرومون کوفه‌لیگی، قویو قازدیردی منهکاش بو شهرین «علی»سی اولمایایدیم ای کاش.
شعبان کریمی
بیر ماوی دنیزین ساحیلینده یم
دالغالار یوکسه لیر سو شافاقلانیر
دنیز ده اؤزونو چیرپیر ساحیله
ساحیلده اؤزونو چیرپیر دنیزه
بیر آن باخیرام
دنیز یوخ
سو یوخ
دوزلاردی یوکسه لیر دالغالار کیمی
دنیز ده ساحیلدن کوسولو دوشوب
قوروموش بیر دنیزین ساحیلیندیم
ثریا بخشی (آیلار)
جیبی پولسوز فیکره گئتمیش
درد الیندن خسته لنمیش
آتا ائوده اوتورموشدو
حکیم وئرن داواسی دا
یوخسا اونون قورتولموشدو
بیله، بیله او گون آنا
اوباشدان سیز اوروج ایدی
وارلی قونشو مطباخیندان
قوزاندیقجا پیشمیش اییی
یازیق آتا اوتاندیقدان
اوز گؤزوندن تر سوزوردو
کوچه ده بیر خیردا چؤرک
ییغان کیشی قیشقیریردی
وئجه گلمز کاسا بوشقاب
کؤهنه خالچا کؤهنه میسی
خالقدان آلماق ایسته ییردی
آمما ائوده «آه» دان سووای
نئیله مه لی ساتماق ایچین
گؤزه بیر شئی گؤرونموردو
خیالیندان قیزین بیر زاد
سوووشارکن باشی آچیق
تئز کوچه یه قاچیب دئدی:
باغیشلایین بوش سیفرا دا
آلیرسیزمی؟؟؟
رامین سلطانی
گؤزلریم
باغلاریزین آل ساری سیندان
آسلانیب
ال لریم
اسکی قبریسانلیق تک
باغلانیب، باغلی یاتیب
پاخیرلانیب
اوزانین
دؤشونده کی دستانلار
دئدیلر کی
پاسلانیب.
آزاده دارایی
آنا یوردی وطنیم زنجانیما قوربان اولوم——– شهریمین او یاراشیخلی آدینا قوربان اولوم
دولانیم دوره سینه، باغینا دروازه سینه ——– آق چیچکلر آچیلاندا یایزینا قوربان اولوم
او گوزل منظره سی، بیهیشته بَنظر هاواسی ——– او باشیم دردیمه درمان سو ئونا قوربان اولوم
یئل اَسَنده اوجا بوی آقاشلارین اویناماقی ——– آق بولوتلاردان اوچان دورنا سینا قوربان اولوم
گون چیخاندا او طراوتلی آقاشلار باشینا ——– گون آشاندان سونرا گویچک آیینا قوربان اولوم
عیسی قاسمپور(افشارزنگانلی)
1: آیدان آری، گوندن دورو اوزون وار
ایکی تیله شراب ایچره گؤزون وار
اؤلدور منی، گینه ده بیر سؤزون وار؟!
جان یارانیب سنه قوربان اولا دا!
دونیاده می اولار بیر زات قالا دا؟!
2: بارماغیندا او قوش نه خوش اوتوروب
دومدوگونده بیر بالا گول گؤتوروب
بالا گولو، سن گوله پای گتیریب
بزه یه جک ساچین «افشار» او گول له
آی تروریست! آی هر گؤزون بیر گولله!
